ناس ضهب تحب من طرف

عليك امان الله عندنا واحد كدي قلبو زي الزريبه لامي (الهيب والضيب).. علا ما يشوف طريف توب ولا طريحتن لافه إلا يجري وراها زي (السخل المباري أمو) .. أزول أخير تتقل وتركز وأبقالك على واحدة لا قدام .. ياكافي البلاء أي بنية تجي الحلة دي جديدة يا زول إنت عامليها (قيس) زمانك تقعد تسبل في عيونانك الكلو فردة من بلد ديل (تقول شاريهن من السوق ) .. جات بت مدير المدرسة ما خلا (جنا جداد) ما وداهو ليهم ..و حمارك فتر من مشاوير القش البتجيبو لي غنمايتم الوحيدة ديك .. لامن نقلوهم من الحلة حتى (حمارك) أخدلو جمه وإرتاح .. طارت دي بقينا في بت الداية الجابوها لي الشفخانة . فلقت راسي أنا بي سيرته وبي ريدته فيك يا شبه (هاني شاكر) .. وقطّعت نعلاتي بي مشوارهم البعيد داك تشيل وتودي في اللبن وتنقل في اللقيمات .. وأنا المواجعني تقول لي أمك سوي لقيمات لي الجنيات عشان ببنوا في حيطة الجامع ( عليك أمان الله اللقيمات السوته أمك .. قروشه تبني ليها جامع براها ) والبشوفك شايل الشنطة حقت الولادة لي أمها يقول إنت ( ألاخسائي) عدييل وهي (السستر) .. أها لامن لفحوها من قدامك وقعدت تغني في ..

في الدايات حليل مجلسنا ... الهوى والغبار حارسنا

خلصنا من ده كلو ونحمد الله أخدنا جمه وقلنا الزول عقل تجي الليلة تطلع لي بفلم هندي جديد ... أسي إنت موظف المجلس الجديد عرفتو سمح يادوب جيرانو ما عرفو.. إنت ماشي ناطي (تحب) في بنيتو .. وياها الشوفه الواحدة الفي المشرع ديك.. طوالي قام لفحك الهواء البارد داك وقعدت تحلم بكرعيك (المشققات ) ديل ملانات حنة .. وشعرك الزي ( سلك العدة) ده مليان ضريرة .. بقيت خلاس على العرس هسي قبل ما تعرف أي حاجة .
كان منتكي على جمبه ومنشغل يرسم في الواطة وكلامي الكتير ده كلو سوالو بين الأضان والتانية (سبلوقة) ما جاب فيهو خبر .. قام عدل قعدتو .. وثبت سفة الصعوط كويس في خشمو .. وصلح الطاقية سمح وهي بالله (زي المنديل المشرور في شجرة ليمون) .. وقام كده وإنعرض فوقي :
إنت بتعرف الريدة والمحبة من وين؟؟ ... إنت ياكافي البلاء من تشوفلك بينة كرعيك يقعدن يطاشقن مع ضلهن .. إنت بتعرف للسماحة شنو ؟ ... إنت تشكّر لي في (حمدية)البتبيع القش) تقول سمحة وهي كرعينا زي مكلوجات (كاريكا).. إنت ما لافي الحلة كراع كلب ياتو بت البتعاين ليك عامل وشك (المحنوف) ده .. تعرف للحسادة .. وتجي تمد لسانك فوقي وتقول لي أركز وأتقل ... والله أنا البنية من عيني وقعت فوقه (أزرق عيوني راح) وبقيت في نار الله .. البنية ماشاء الله عليها سماحة ونشاط .. أجنا والله البنية من نشاطه مشوار المشروع ده تقطعو في دقائق بالله (زي الدحش) .. وعليك أمان الله (نعلاته) تراب ما بشيلن (تقول لابسة كدارة) . تبارك الله تأكل الرملة دي زي (عجلة الفرن) . وكان جيت لي الوشي والله ( كلاش وضربة فلاش) .. والعوينات شايلات نص الوشي .. أزول سماحة لا ليها أول ولا أخر .. ومن نظرته لي عرفت البنية رقدت (هردبيس ) فيني .
ونحن في نص كلامنا .. تجي البنية زاته بي زاته مارة بجنبنا .. والحقيقة يا ناس الله .. الله خلق وطلق .. بنية (مبغبغة) زي خروف الضحية ..(تقول مربية في مزرعة) .. تشوفه من بعيد زي (كبتل أس) .. تتقدل في الواطة (زي البتحسب في بلنتي) وحلاة القدلة فوق أهله .. حليوه وقائمة بجهله .. وأعاين لي زولي تقول رشوهو بي (بف باف ) .. يقعد ينف ودموعو تسيل وعيونو ترف .. وريقو يجف .. وحالتو تحنن الكافر .
وهي أظنها خابره الحاصل ووجع زولنا المقيل في المفاصل .. وفي مشيتها تقوم تشغل في (الدفع الرباعي) .. وتخلي ليك بين (الميتة والحياة) ... وحلف وجزم إنو من قومتنا دي عديل لي بيتهم .. نمش ناس خطوبة وعرس ساي ..
قلتلي .. أجنا كعب الجن والطرطشة .. إنت لا خابر إسمها .. لا إسم أبوها .. لا أصلها لا فصلها .. تمش تطق باب الناس والسيرة تبقى في الدرب .. قال لي .. أزول بتدور تمش معاي ولا أشوف غيرك .. حالي أنا الخاتيك لي جنس الوقفات دي بتدور تخذلني .. الإسامي والأصل والفصل ده كلو بنعرف قدام.. أنا قلتلك أبقالى (ماذون) .. أها أنا طوالي جنس الكلام ده بجيب لي (وجع الحنيس) و (ألم الخاتر) .. قلتلو أزول (تنقد الرهيفة) (أنا أخو المشلخة بالمتر) .. قوم أرح .. البنية ما بتنفات ..
أها كربنا الدحيشات تمام . وقمنا كدي بترس تقيل بنمرة تلاتة. وإتوكلنا مشينا لاعن الباب الليلن .. طقينا الباب .. بعد شوية جاء واحد فتح الباب عليك أمان الله أنا قايلو (ركيزة الباب) بالله واحداً قدر (المزيرة) .. 3× 2 ومعروش زنكي .. بالله أخونا راحة يدو بس بالله قدر (بطن الشافع) الزول طايبنه تب ودخلنه جوه البيت وأكرمنه بالشربات.. أها أنا الشليق قلت أدخل في الموضوع توش :ـ
قلتلو .. والله نحن في الحقيقة من جنيات الحلة هنا وجينا نتشرف ونتعرف .. ولقيناك زولاً كريم وهميم .. دحين (ولدنا) (شوفو القهاره ساي ولدنا) . ده بدور يناسبك ويختب بتكم .. أها الزول عاين لينا كده مستغرب وقال : لكن أنا ماعندي بنات تب .. لا سغار ولا كبار .. أنا لا هسي ما جبت جنيات .. بعد شوية جات زولتنا الما بتغبانا جايبه الشاي المو خمج .. ختت الشاي ودخلت .. أها ولدنا قرب ينط لي الراجل في حلقو .. قالوا .. كيف تقول ما عندي .. أنا بدور دي زاته الجابت الشاي دي ... بدور في سنة الله ورسوله .الراجل وشو إتغير .. والعيون كبرن وحمرن شديد .. السنون قعدن يضربن في بعض .. وقال : أيواا إنتو يعني جايين لي مرتي .. جايين طالبين (مرتي ) للعرس .. وفي سنة الله ورسوله .. وقام علي حيلو :

أها يسعلني الله قومتو ما تماها .. نحن لا عرفنا داير يقول شنو؟ ولا يسوي شنو ؟ أنا وزولي (الجلابية نصها في الخشم ) .. و (الدحيشات) في خطراتنا ما عارفات الحاصل شنو ؟ ودقيقتين بس نحن في المشرع ويا الخرتوم جاك بلاء .. أها في الدرب قال لي : يا ربي الراجل ده وقف علي حيلو بدور يسوي شنو؟؟؟؟ ....
قلتلو : يمكن كان بدور ينادي المره يطلقه ليك ...

وبعدها ما رجعنا البلد إلا لامن نقلو الزول ده من المجلس ..

هلا با الغالى وتقبل مرورى